კურსის შესახებ

კურსი ხელს შეუწყობს მონაწილეებს, გაიაზრონ და შეაფასონ საბუნებისმეტყველო საგნების სწავლებაში განხორციელებული ცვლილებების მნიშვნელობა; შეისწავლონ მოსწავლეზე ორიენტირებული კონკრეტული სასწავლო სტრატეგიები, მეთოდები და მიდგომები; გაიცნონ პრაქტიკაში მათ დასანერგად საჭირო კონკრეტული ტექნიკები და გავარჯიშდნენ გამოყენებაში მოდელირების გზით. კურსი დაეხმარება მონაწილეებს, დანერგონ თავიანთ პედაგოგიურ პრაქტიკაში კვლევაზე, პრობლემაზე, პროექტზე დაფუძნებული სწავლება; შეიმუშავონ სასწავლო პროცესის დიფერენცირების კონკრეტული გზები, როგორც სასწავლო მასალის შინაარსის, ასევე მეთოდოლოგიის მიხედვით; გამოიყენონ შეფასების სხვადასხვა სტრატეგიები მოსწავლეზე ორიენტირებული სწავლების პროცესში; გააცნობიერონ სასწავლო პროცესის წარმართვის აუცილებლობა 21-ე საუკუნის მოთხოვნებისა და საჭიროებების მიხედვით, შექმნან თემატური და გაკვეთილის გეგმები აღნიშნულის გათვალსწინებით.

1. გამოიყენოს რვა სამეცნიერო პრაქტიკა ქიმიის სწავლა-სწავლების პროცესში;
2. გამოიყენოს სამეცნიერო მეთოდი როგორც ქიმიის კვლევაზე დაფუძნებული სწავლების საშუალება, სწავლების, დიფერენცირებისა და შეფასების მიზნით;
3. დანერგოს სასწავლო პრაქტიკაში საკვლევ შეკითხვაზე, პრობლემაზე, პროექტზე დაფუძნებული სწავლება;
4. გამოიყენოს სწავლების კონკრეტული სტრატეგიები (სტრატეგია „მმმ“, სტრატეგია „იდენტიფიცირება და ინტერპრეტირება“) მოსწავლეებში არგუმენტირებული მსჯელობის, მონაცემების ანალიზისა და ინტერპრეტაციის უნარების განვითარებისათვის;
5. ქიმიის სწავლებისას გამოიყენოს მოსწავლეზე ორიენტირებული სწავლების კონკრეტული მეთოდები: ვებ-ძიება, ვირტუალური ლაბორატორიები, მანიპულატივები;
6. მოახდინოს სასწავლო პროცესის დიფერენცირება როგორც სასწავლო მასალის, ასევე მეთოდოლოგიის მიხედვით;
7. გამოიყენოს მრავალფეროვანი სტრატეგიები და ინსტრუმენტები განმავითარებელი და განმსაზღვრელი შეფასების მიზნით;
8. დაგეგმოს თემა/გაკვეთილი ტრენინგზე შეძენილი ცოდნის გათვალისწინებით, 21-ე საუკუნის მოსწავლის მოთხოვნებისა და საჭიროებების შესაბამისად.